Benvignûts

Chest al è il sît uficiâl dal comitât 482. Parcè che la difese di une lenghe e dai dirits di cui che le dopre e je une cuestion di rispiet dai dirits umans fondamentâi.

Comitât 482 une bataie pai dirits

A son coventâts passe 50 agns parcè che inte Republiche taliane e fos fate buine une leç gjenerâl di tutele des minorancis linguistichis. La aprovazion di cheste leç (la 482 dal 1999) no à dut câs segnât la disparizion di mûts di fâ e di pensâ antidemocratics che a viodin tes minorancis un probleme e no une ricjece. Lis dificoltâts, i berdeis e i atacs ae 482 a son la prove plui clare che la discriminazion e il dinei dai dirits des comunitâts minoritariis a son ancjemò vîfs. Il Comitât 482 al è nassût in Friûl tai prins mês dal 2002 propit cun chê di fâ rispietâ i dirits des comunitâts linguistichis e nazionâls che a caraterizin cheste tiere. Associazions, grups e mieçs di informazion des comunitâts furlane, slovene e gjermanofone si son dâts adun par puartâ indenant cheste bataie di dirit e di democrazie. Il Comitât 482 e je la rispueste de societât furlane a cui che al vûl dineâi dirits fondamentâi - tant che chei linguistics - che a son ae fonde di ogni vere democrazie. O sperìn che il nestri esempli e la nestre lote a cjatedin simpri plui poie sei in Friûl che di chês altris minorancis che a vivin intal stât talian

Iniziativis in evidence

Valutazion su la politiche linguistiche intal F.V.J. [11-12-2009]

il Comitât 482 al à consegnât al assessôr regjonâl Roberto Molinaro un document di valutazion su la politiche linguistiche de regjon Friûl-V.J. Chest document al è stât inviât ancje a di une schirie di politics elets inte nestre regjon.



Lei il document di valutazion

Fevelâ furlan al è un nestri dirit! [04-09-2009]

Ancje il setemanâl "Io donna" in edicule insieme al Corriere della Sera al continue la campagne di stampe cuintri i dirits linguistics dal popul furlan. "Parlare furlan è un fiume di sprechi" al è il titul dal articul, ricjapât su la cuviertine dal setemanâl de domande "Quanto costa agli italiani tenere viva la lingua friulana?". Ancje in cheste ocasion il Comitât 482 al à decidût di rispuindi a chest articul cuntune campagne di proteste publiche e us invide a dâ la vuestre adesion scrivint une email di proteste ae direzion lettere.iodonna@rcs.it.

L'articul di Io Donna Comunicât di rispueste dal Comitât 482 Letare di proteste

Yes, we speak Friulian! [01-09-2009]

Il setemanâl L'Espresso i fâs cuintri al dirits linguistics dal popul furlan cu la publicazion di un articul che al definìs il furlan un dialet e li che si dîs che i fonts che a coventin par garantî i dirits linguistics des minorancis a son une straçarie di bêçs publics. Il Comitât 482 al à decidût di rispuindi a chestis afermazions difamatoriis e antidemocratichis cuntune campagne di proteste publiche e us invide a dâ une man mandant une email di proteste aes direzions espresso@espressoedit.it e letterealdirettore@espressoedit.it

L'articul dal Espresso Comunicât di rispueste dal Comitât 482 Letare di proteste

Adesions dai candidâts al document pes elezions europeanis [30-05-2009]

Vuê il Comitât al à vût un incuintri public cui candidâts aes elezions europeanis 2009. In chest incuintri al è stât presentât il document che il Comitât al à mandât a ducj i candidâts de regjon al Parlament european domandant la lôr adesion. Tai leams chi sot o podês cjatâ il document e lis rispuestis dai candidâts.


Document pes elezions europeanis 09 Adesions dai candidâts Comunicât stampe

Incuintri public dal Comitât 482 cui candidâts aes elezions europeanis [25-05-2009]

Par sensibilizâ il mont politic regjonâl su la situazion dai dirits linguistics in Friûl - V. J., sabide ai 30 di Mai inte sale Pasolini dal palaç gnûf de Regjon (Udin) il Comitât 482 al fasarà un incuintri public cui candidâts dal Friûl-V.J. aes elezions pal Parlament european. Dopo di cheste iniziative a son in program altris incuintris cui politics regjonâi e i parlamentârs elets in Friûl-V.J.

Conference stampe e comunicât dal Comitât 482 [25-05-2009]

Intant de conference stampe di vuê ai 25 di Mai dal 2009, al è stât dât fûr il gnûf comunicât dal Comitât 482 su la sentence de Cort Costituzionâl e sui tais dai fonts ae leç 482. Inte foto il puartevôs dal Comitât Carli Pup intant de conference stampe.



Lei il comunicât Scolte la conference stampe

Conference stampe di presentazion dal rapuart sui dirits linguistics [22-05-2009]

Lunis ai 25 di Mai a Udin e sarà la conference stampe di presentazion dal rapuart su la situazion dai dirits linguistics de minorance furlane prontât dal Comitât 482 che al è za stât mandât al Ministeri dal interni talian e al Comitât european che al à il compit di controlâ la metude in vore de Convenzion Cuadri pe Protezion des Minorancis Nazionâls. La conference stampe e sarà regjistrade di Radio Onde Furlane e e vignarà trasmetude Martars ai 26 di Mai aes 8.30 e aes 12.30.

Rapuart su la situazion dai dirits linguistics de minorance furlane